Ал Шабаб презеде контрола врз сомалиското пристаниште МеркаМогадишу, 5 февруари 2016 (МИА) - Милитантната исламистичка група Ал Шабаб презеде контролата врз пристанишниот град Мерка во Сомалија, јавија западните медиуми, повикувајќи се на изјави на локални жители.
Пристаништето Мерка се наоѓа на само 70 километри југозападно од главниот град Могадишу и сега е најголемиот град што исламистите го имаат под своја контрола.
Според изјави на очевидци, војниците на Силите на Африканската Унија, кои го имаа под своја контрола овој град повеќе од 3,5 години, се повлекле од Мерка денеска во раните утрински часови.
Гувернерот на регионот Долна Сомалија изјави дека борците на Ал Шабаб го зазеле градот без борба.
Ова е најголем „пораз“ на Силите на Африканската Унија во нивната борба со милитантните исламисти и настојувањето да се спречи Сомалија да се најде под целосна контрола на Ал Шабаб.
Исламистите беа протерани од Могадишу во 2011 година.
Борбите со Ал Шабаб околу контролата на оваа африканска земја на Рогот од Африка траат повеќе од 10 години.
|