Од продажбата на конфискуваниот имот на експретседателот Бен Али во државната каса на Тунис влегле 450 милиони евраТунис, 10 февруари 2016 (МИА) - Од продажбата на конфискуваниот имот на поранешниот туниски диктатор Зин ал Абидин бен Али од 2011 година досега во државната каса влегле приближно 450 милиони евра, информира министерот за финансии Слим Шакер, цитиран од француските медиуми.
Во месеците по избувнувањето на револуцијата новите туниски власти одзедоа компании, недвижен имот, луксузни автомобили и накит, што им припаѓале на Бен Али, неговата сопруга Лејла Трабелси, семејството и десетици нивни блиски, вклучувајќи и многу бизнисмени.
До овој момент е продаден само дел од овој имот, главно при распродажбата од крајот на 2012 година.
- Од 2011 година до сега сме продале имот за речиси 1,5 милијарда динари, а приближно милијарда (околу 450 милиони евра) влегоа во државната каса, додек останатите 500 милиони послужија за покривање на долговите, изјави Шакер пред новинарите.
Приходите влегоа во државниот буџет и на државата и дадоа можност да зема помал заем, забележа министерот.
- Тоа не е лесна задача, правиме се што е во нашите сили. Можам да Ве уверам дека во втората половина на 2015 година ги засиливме активностите за управување со конфискуваниот имот и со сите средства се грижиме да обезбедиме максимални упати во државната каса, објасни министерот.
Поранешниот претседател и неговата сопруга од јануари 2011 година живеат во прогонство во Саудиска Арабија.
|