Кери и Лавров ја отворија конференцијата за Сирија

Минхен, 11 февруари 2016 (МИА) - Американскиот државен секретар Џон Кери и рускиот министер за надворешни работи Сергеј Лавров ја отворија конференцијата за Сирија во Минхен, која има за цел повторно покренување на мировниот процес во земјата.

Русија предложи примирје од 1. март, а Вашингтон оцени дека тоа на Москва и на сириската Влада ќе им даде уште три недели да ги уништат умерените бунтовнички групи. САД предложија примирјето веднаш да стапи во сила.

Пред состанокот Кери одби да шпекулира дали е можно да се постигне договор.

- Ќе имаме сериозен разговор за сите аспекти за тоа што се случува во Сирија. Очигледно сакаме во еден момент да постигнеме напредок во доставувањето на хуманитарна помош и прекин на огнот, посочи Кери.

Лавров потенцира дека Русија поднела „прилично конкретен предлог“ и оти ќе чека на одговор од САД, а потоа предлогот ќе го изнесе пред Меѓународната група за поддршка на Сирија, која ќе има средба во текот на денот.