Вонредна седница на СБ на ОН за ситуацијата во Алепо

Њујорк, 4 мај 2016 (МИА) - Советот за безбедност на ОН денеска ќе одржи вонредна седница по барање на Франција и Велика Британија, со цел да се разгледа ситуацијата во сирискиот град Алепо, каде се водат жестоки борби меѓу владините сили и бунтовниците.

Заменик генералниот секретар на ОН за политички прашања Џефри Фелтман ќе ги запознае 15-те земји членки на Советот за безбедност со ситуацијата во Алепо. Извештај ќе поднесе и заменик генералниот секретар за хуманитарни прашања Стивен О’Брајан, по што ќе следува седница зад затворени врати.

- Алепо е град маченик, кој е во центарот на отпорот против сирискиот претседател Башар ал Асад, истакна францускиот претставник во ОН, Франсоа Долатр, додавајќи дека „овој град за Сирија е исто што Сараево беше за Босна“.