Ирачките сили го разбија противнападот на „Исламската држава“ во јужна Фалуџа

Багдад, 31 мај 2016 (МИА) – Ирачката војска којашто се обидува да продре во Фалуџа, утринава го одби четиричасовниот контранапад на борците на „Исламската држава" (ИД) во јужниот дел на градот, пренесува БТА. 

Според извори од ирачките специјални единици, исламистите ја започнале офанзивата взори во месноста Нуејмија. Тие притоа напаѓале од ровови и подземни тунели. Во нападот, исто така, биле вклучени и снајперисти и шест автомобили наполнети со експлозив. Автомобил-бомбите биле целосно уништени и неутрализирани пред да нанесат штети, изјавија ирачките воени власти.

Вчера владините сили презедоа близу 85 отсто од ова населено место, коешто се наоѓа на 65 километри западно од Багдад. Ова ним им беше првото навлегување во Фалуџа откако пред две години градот падна во рацете на ИД.