Вашингтон, 1 јули 2016 (МИА) - Американскиот заменик-претседател Џо Бајден ќе учествува следната недела прв пат во кампањата на Хилари Клинтон за претседателските избори, соопшти денеска нејзиниот тим.
Бајден ќе присуствува на манифестација заедно со Клинтон на 8 јули во Скрантон, во сојузната држава Пенсилванија, четири дена по вклучувањето во кампањата на претседателот Барак Обама, кој ќе ја придружува кандидатката на демократите во Шарлот, Северна Каролина.
Во Скрантон, родниот град на Бајден, заменик-претседателот и кандидатот за претседател ќе говорат за заедничките напори за изградба на земја, во која сите заедно се посилни и за економија, која ќе работи во корист на сите, а не само на врвот, се наведува во соопштението на екипата на Клинтон.
Пенсилванија и Северна Каролина не се случајно избрани за први средби на Обама и Бајден со американските гласачи. Двете сојузни држави може да имаат големо влијание на изборите на 8 ноември.