Трамп: Приказните за блиско пријателство со Путин се „нова шега“Вашингтон, 25 јули 2016 (МИА) - Кандидатот на Републиканската партија за претседател на САД, Доналд Трамп денеска негираше дека Русија се обидува да ја помогне неговата кампања, со тоа што објави илјадници мејлови на Демократскиот национален комитет (ДНЦ).
Викиликс вчера објави околу 20.000 мејлови на Демократската партија, кои сугерираат дека активно се работело на дискредитација на кампањата на сенаторот од Вермонт, Берни Сандерс.
Трамп денеска на Твитер напиша дека тврдењата оти Русија ги објавила мејловите бидејќи тој му се допаѓа на рускиот претседател Владимит Путин, е „нова шега која кружи низ градот“.
Шефот на кампањата на демократскиот кандидат за претседател на САД Хилари Клинтон, Роби Мук, вчера ги обвини „руските државни играчи“ за хакирање на мејловите на ДНЦ со цел да му помогнат на Трамп.
Мук посочи дека не е случајно што мејловите се објавени непосредно пред почетокот на Конвенцијата на Демократската партија во Филаделфија, на која Клинтон официјално ќе биде именувана за кандидатка за претседател.
|