Истрага за малтретирање деца во поправен дом за малолетници во АвстралијаСиднеј, 26 јули 2016 (МИА) - Австралискиот премиер Малком Трнбул нареди истрага во врска со малтретирање деца во центар за задржување малолетници, по објавените снимки на кои чувари употребуваат солзавец против тинејџери и заврзуваат со ремен на стол полуголо момче со качулка на главата.
Австралиската телевиција Еј-Би-Си синоќа емитуваше снимки од надзорните камери во центарот за задржување во градот Дарвин во покраината Северна Територија, снимени меѓу 2010 и 2015 година.
Објавениот материјал предизвика жестоки реакции во земјата, а властите од локално ниво, па се до премиерот негираат дека знаеле за снимките.
- Како и сите други Австралијци бев длабоко шокиран и згрозен од тие снимки, на кои е прикажано малтретирање на деца во центарот за задржување „Дон Дејл“, вели Трнбул.
Премиерот нареди истрага на највисоко ниво во соработка со властите од Северната Територија.
- Неопходна е темелна и брза истрага, со цел да се одреди што се случило и како било дозволено сето тоа да се случува толку долг временски период, а при тоа да не биде откриено, рече тој.
Снимките покажуваат како чуварите ги соблекуваат малолетниците, од кои многумина се Абориџини и ги прскаат со солзавец. Некои од децата останувале во самица со недели.
Еј-Би-Си не откри како дошла до снимките, со цел да ги заштити своите извори.
Северната Територија има највисоко ниво на криминал меѓу младите во Австралија, при што 97 отсто од малолетните затвореници се Абориџини.
|