Фронтот Ан Нусра го промени името во „Џебхат Фатах аш Шам“

Бејрут, 28 јули 2016 (МИА) - Фронтот ан Нусра (Џебхат ан Нусра) денеска се преименува во „Џебхат Фатах аш Шам“ така што меѓународната заедница, САД и Русија веќе нема да можат да го користат како претекст за врските со Ал Каеда, за да ги напаѓаат Сиријците, изјави лидерот на групата Абу Мохамад ал Џолани, цитиран од британските медиуми.

Класификацијата на Ан Нусра како терористичка организација ја исклучи од спогодбата за прекин на огнот во февруари, а Русија и САД договорија потесна соработка за дејствијата против групата.

Ал Џолани претходно денеска ја соопшти и веста за прекин на врските меѓу неговата група и мрежата Ал Каеда, пренесоа француските меидуми.

Во изјавата емитувана на  телевизијата „Ал Џазира“, водачот на втората најголема џихадистичка група во Сирија им заблагодари  на командантите на Ал Каеда за покажаното разбирање за неопходноста од прекин на сите врски, подвлекувајќи дека одлуката има за цел да ја заштити сириската револуција.