Антиџихадистичката коалиција призна дека при нејзини напади загинале и цивили

Вашингтон, 29 јули 2016 (МИА) - Меѓународната коалиција за борба против групата Исламска држава потврди при нејзини напади во Ирак и Сирија во последните месеци биле предизвикани нови цивилни жртви. 

- Длабоко жалиме за несаканите загуби на цивили и за повредени при нападите. Изразуваме сочувство до семејствата на жртвите, се наведува во соопштение од американската Воена команда на Блискиот Исток.

Со тоа официјално потврдените цивилни жртви од почетокот на кампањата изнесуваат вкупно 55 лица.

Коалицијата, предводена од САД, која извршува напади врз џихадистите од август 2014 година, го призна предизвикувањето на цивилни жртви дури по долги истраги и обвиненија дека коалициската команда го потценува нивниот број.

Според Сирискиот центар за мониторинг на човековите права, со седиште во Лондон, во нападите извршени од коалициските сили во Сирија се убиени околу 600 цивили, меѓу кои 136 деца.

Друга, пак, лондонска невладина организација „Еруорс“ смета дека жртвите на нападите од коалицијата во Сирија и Ирак се над 1.500.