Женева, 29 јули 2016 (МИА) - Меѓународната организација за миграции (ИОМ) денеска соопшти дека над 3.000 лица годинава загинале при обид да го минат Средоземно Море, што е приближно 60 проценти повеќе во споредба со истиот период од 2015 година.
ИОМ посочи дека со најновите 39 тела пронајдени неделава на либискиот брег, вкупниот број на загинати при обид да го преминат морето се зголемил на 3.034 мигранти и бегалци.
Податоците на ИОМ покажуваат дека 2016 година е трета година по ред како при вакви обиди загинуваат над 3.000 лица.
ИОМ прецизира дека над 250.000 мигранти и бегалци годинава влегле во Европа по море, главно во Грција и Италија.
Организацијата забележува делумно засилување на тенденцијата во Италија да пристигнуваат Нигеријци, посочувајќи дека нивниот број „драстично се зголемил од почетокот на 2015 година“.