Инаугурација на новиот претседател на Перу Педро Пабло Кучински

Лима,29 јули 2016 (МИА) - Новоизбраниот претседател на Перу, 77- годишниот Педро Пабло Кучински, денеска беше свечено инаугуриран во главниот град Лима.

Овој поранешен банкар, експерт за инвестиции, победи на претседатеските избори, со минимална предност, пред неговиот противкандидат, Кеико Фуџимори.

Во предизборното испитување на јавното мислење, таа важеше за фаворит, па лесно победи во првиот изборен круг. Во вториот круг гласање, Фуџимори не успеа да стане претседател на државата, откако беше поразена од Кучински за само една четвртина процент од гласовите.

Броењето на избрните гласови во некои изборни единци беше повторено, но на крајот 30 години помладата Фуџимори му ја честиташе победата на својот противник.

Таа е ќерка на поранешниот перуански претседател Алберто Фуџимори кој издржува долгогодишна казна затвор. Пред десетина денови беше одбиено неговото барање за помилување и за порано излегување од затвор.

Новиот претседател Кучински во текот на својата предизбрна кампања се залагаше за „социјална револуција“ во Перу.

Во својот говор при инаугурацијата Кучински изрази надеж дека, во текот на неговит петгодишен мандат, Перу ќе се уреди како помодерна, посправедлива и порамноправна држава.

Оваа андска земја од Јужна Америка, последниве години бележи забрзан раст во економијата, но многу Перуанци и натаму живеат во сиромаштија.

За да ги спроведе реформите во општеството за кои се залагаше во избрната кампања, Кучински ќе мора да ја има подршката од партијата на Кеико Фуџимори, која има мнозинство во перуанскиот Конгрес.