Канада регистрира зголемен број екстремисти кои заминуваат во странство

Отава, 26 август 2016 (МИА) - Зголемен е бројот на лицата кои од Канада заминале за странство и кои се осомничени дека учествувале во радикални активности, изјавија официјални безбедносни претставници, цитирани од британските медиуми.

Тие прецизираа дека расте и бројот на жени кои заминуваат за да се борат во редовите Исламска држава.

Податоците од годишниот извештај на министерот за јавна безбедност, Ралф Гудејл, покажуваат дека кон крајот на 2015 година 60 екстремисти, кои во Канада се нарекуваат „патувачки екстремисти“, се вратиле во земјата.

Портпаролот на Гудејл прецизира дека овие лица се наоѓаат под полициско набљудување.

Главната закана за безбедноста на земјата доаѓа од индивидуи или мали групи кои повеќе се инспирирани од вооружените групи, како Исламска држава или Ал Каеда, отколку што се раководени од нив, се посочува во документот.

На крајот на минатата година владата имало информации за 180 лица, кои на различни начини се поврзани со Канада, а кои биле во странство и за кои има сомненија дека учествувале во активности поврзани со тероризам. За споредба, во 2014 година нивниот број изнесуваше 130 лица.