Вашингтон, 25 октомври 2016 (МИА) - Американскиот државен секретар Џон Кери и иранскиот министер за надворешни работи Мохамед Џавад Зариф се добитници на престижната награда за меѓународна дипломатија на лондонскиот Кралски клуб за меѓународни односи „Четам хаус“ за постигнатата историска спогодба за иранската нуклеарна програма.
Двајцата министри, кои преговараа меѓу 2013 и 2015 година во четири очи или заедно со колегите од групата „пет плус еден“ (САД, Кина, Русија, Франција, Велика Британија и Германија) се одликувани со наградата како признание за нивната клучна улога во 2015 година за пронаоѓање решение за една од најтешките кризи во меѓународните односи на 21. век, се вели во соопштението на лондонскиот Институт.
Спогодбата, која треба да го гарантира мирновременскиот карактер на иранската нуклеарна програма во замена за укинување на санкциите, беше склучена на 14 јули 2015 година и стапи во сила на 16 јанаури оваа година.
- Многумина ја сметаа оваа спогодба за невозможна, но таа се покажа како победа на дипломатијата и победа против ширењето нуклеарно оружје, посочи „Четам хаус“.
Меѓу носителите на годишната награда на „Четам хаус“ се поранешниот државен серкетар и актуелен кандидат за Белата куќа, Хилари Клинтон, мјанмарската опозициска лидерка и актуелен министер за надворешни работи Аунг Сан Су Чи и организацијата „Лекари без граници“.