ОН: ИД оваа недела егзекутирала најмалку 232 лица во близина на МосулЖенева, 28 октомври 2016 (МИА) - Најмалку 232 лица се убиени од џихадистичката група Исламска држава во текот на оваа недела во близина на градот Мосул, за чие освојување ирачките сили започнаа воена операција, изјави портпаролка на ОН.
- Постојат сведоштва за егзекуција со огнено оружје на 232 лица, од кои 190 се поранешни припадници на ирачките безбедносни служби, истакна портпаролката на Високиот комесаријат на ОН за човекови права, Равина Шамдасани.
Таа нагласи дека ИД во Ирак киднапирале десетици илјади мажи, жени и деца од реони во околината на Мосул и ги користат како жив штит во градот.
Американскиот генерал на воено воздухопловните сили, Метју Ајлер изјави дека ирачките сили преземале 40 села од ИД во близина на Мосул.
|