Околу 70.000 Ирачани ги напуштиле своите домови од почетокот на операцијата во Мосул

Женева, 22 ноември 2016 (МИА) - Речиси 70.000 лица ги напуштиле своите домови, откако на 17 октомври започна операцијата за ослободување на ирачкиот град Мосул од џихадистичката група Исламска држава, соопшти денеска Службата на ОН за координирање на хуманитарните прашања.

Според податоци на Службата, за една недела од 14 до 20 ноември бројот на раселени луѓе се зголемил за 14.000, достигнувајќи 68.550 лица. Седумдесет и осум проценти од жителите на Мосул кои побегнале од судирите нашле засолниште во кампови, а останатите во други населени места. 

Меѓународната организација за миграција истакна дека од 18 ноември над 8.300 Ирачани ги напуштиле своите домови.

Најновите истражувања покажуваат дека ИД употребила хемиско оружје во Ирак и Сирија најмалку 71 пат од 2014 година.