Бунтовниците не им дозволуваат на бегалците да го напуштат Алепо

Бејрут, 23 ноември 2016 (МИА) - Бунтовниците не им дозволуваат на десетици семејства да го напуштат источниот дел на Алепо, додека владините сили, поддржани од Русија ги интензивираат нападите врз окупираните квартови, соопшти Сирискиот центар за мониторинг на човековите права.

Сириски и руски медиуми тврдат дека бунтовниците ги користат 275 илјади цивили, кои останале во Алепо како човечки штит.

Опозициски медиуми од своја страна сакаат да покажат дека цивилите никогаш нема да се согласат да се вратат под власта на Башар ал Асад.

Копнени сили на сириската Влада навлегле синоќа во источниот дел на Алепо, истакна Центарот. Според податоци на невладината организација, со седиште во Лондон, хеликоптери на Владата фрлиле и отровен гас врз окупираните региони.

- Режимот на Башар ал Асад зазеде околу една третина од клучниот кварт Масакин Ханано, изјави Рами Абдел Рахман, директор на Центарот. Тој додаде дека тоа е клучен и важен чекор за сириската армија.