Њујорк, 23 ноември 2016 (МИА) - До крајот на 2016 година речиси половина од светското население ќе користи Интернет, бидејќи мобилните мрежи растат, а цените паѓаат, иако повеќето ќе бидат концентрирани во развиениот свет, објави Меѓународната телекомуникациска унија на Обединетите нации.
Интернет користат и до 80 отсто од жителите во развиените земји, додека онлајн е само 40 отсто од популацијата на земјите во развој и 15 проценти во слабо развиените држави, пишува во извештајот на Агенцијата на ОН.
Во неколку сиромашни и нестабилни африкански земји секоја десетто лице е на Интернет.
Оние, кои не ја користат глобалната мрежа најчесто се жени, постари лица, слабо образованите луѓе, сиромашните и оние кои живеат во руралните подрачја, нагласува Агенцијата специјализирана за информациска и комуникациска технологија.
Глобално гледано со Интернет се служи 47 отсто од светската популација, помалку од планот, кој го постави ОН - 60 отсто до 2020 година.
Без Интернет се најмалку 3,9 милијарди луѓе, што е повеќе од половината жителите во светот, а Агенцијата очекува дека пристап до мрежата до крајот на оваа година ќе имаат 3,5 милијарди луѓе.
- Во 2016 година луѓето повеќе не одат на Интернет, тие се на Интернет. Ширењето на 3-Г и и 4-Г мрежите ширум светот донесе на Интернет се повеќе и повеќе луѓе, се вели во извештајот.
Телекомуникациските и интернет компаниите се шират, а се подостапните паметни телефони им го олеснуваат на луѓето сурфањето на Интернет, но послабо развиените земји заостануваат зад остатокот од светот.
- Пристапот до Интернет во тие земји е на ниво на развиените држави од 1998 година, што значи дека послабо развиените земји 20 години заостануваат зад развиените, додава Агенцијата.