ОН: Во борбите во Мосул уништени домовите на над 148.000 лица Багдад, 17 јануари 2017 (МИА) - Обемната воена операција на ирачката армија за потиснување на џихадистичката група Исламска држава (ИД) од градот Мосул, остави без покрив над главите над 148.000 лица, соопштија денеска Обединетите нации. Според податоците на ОН, само во текот на минатата недела биле уништени или оштетени домовите на околу 12.500 жители на Мосул. Во соопштението на Светската организација се посочува и дека жестоките борби во вториот по големина град во Ирак, резултурале и со голем број на цивилни жртви. ОН во документот ги обвинуваат џихадистите дека во неколку наврати стрелале врз цивили кои се обидувале да побегнат од деловите на градот што се под нивна контрола. Според податоците на меѓународните организација, пред почетокот на ирачката офанзива за ослободување на Мосул, во окотмври минатата година, во градот живееле над еден милион лица. Ирачката армија тврди дека во досегашниот тек на офанзивата нејзините сили презеле контрола врз поголемиот дел од источната половина на Мосул, како и врз три од петте клучни моста на реката Тигар, која минува низ градот.
|