Пекинг, 15 март 2017 (МИА) - Кинеската Влада се заложи за мир и стабилност во Јужно Кинеско Море и за решавање на територијалните спорови преку дијалог, изјави денеска кинескиот премиер Ли Кичијанг на прес конференција по годишната сесија на Секинеското собрание на народни претставници (Парламентот), пренесе ТАСС.
-Се надеваме дека ќе видиме траен мир и стабилност во Јужно Кинеско Море. Уверени сме дека споровите треба да бидат разгледувани и решавани преку дијалог меѓу директно засегнатите држави во овие спорови, забележа тој.
Ли Кичијанг, исто така, изјави дека кинеската Влада со оптимизам гледа на односите со ЕУ и ги поддржува интеграциските процеси во Европа.
-Сакам да подвлечам дека Кина секогаш ја поддржувала и ќе ја поддржува единствената, просперитетна и стабилна Европска Унија. Кина, исто така, го поддржува силниот курс на еврото и интеграциските процеси во Европа, додаде тој.
Според него, тензиите на Корејскиот Полуостров може да доведат до конфликт и повика на дијалог за нивното намалување, пренесоа британските меидуми.
-Кина сака Корејскиот Полуостров да биде ослободен од нуклеарно оружје и ги повикува сите земји во корејскиот нуклеарен спор да ги обноват преговорите, изјави Ли, цитиран од американските медиуми.