Нетанјаху со порака до непријателите: Не го тестирајте ИзраелЕрусалим, 24 април 2017 (МИА) - Израелскиот премиер Бенјамин Нетанијаху порача дека секојдневно се раководи со лекциите од Холокаустот и истовремено им се закани на непријателите на Израел да не ја тестираат силата на неговата држава. Израел вчера го одбележа Денот на сеќавањето на жртвите од Холокаустот, со повеќе комеморации за шестте милиони Евреи кои систематски беа убиени од страна на нацистичка Германија и нејзините колаборационисти во текот на Втората светска војна. Зборувајќи на главната церемонија во меморијалниот центар Јад Вашем, Нетанијаху го обвини Иран, архинепријателот на Израел, и такаканеречаната Исламска држава дека се обидуваат да го уништат Израел. Тој додаде дека една од лекциите на Холокаустот е дека „сами се браниме од сите закани и секој непријател“. - Со оваа лекција се водам секое утро и секоја вечер, порача тој, а пренесуваат американските медиуми. Нетанијаху потсети дека Израел е силна нација со една од „најсилните одбранбени сили во светот“ и ги предупреди „оние кои се обидуваат да го уништат дека сами ќе бидат уништени“. Вчерашниот ден, инаку, е еден од најтажните денови во израелскиот календар, наведуваат американските медиуми. Кафулињата и другите места за забава беа затворени додека телевизиите и радио станиците емитуваа документарни програми за Холокаустот.
|