Истражување: Мексико е земја со најмногу убиства во светот, по Сирија

Лондон, 10 мај 2017 (МИА) - Мексико во 2016 година била земјата со најмногу регистрирани убиства во светот, по Сирија, соопшти лондонскиот Меѓународен институт за стратегиски истражувања, цитиран од француските медиуми.
- Во Мексико минатата година беа извршени 23.000 убиства со умисла, додека во Сирија имало 60.000 вакви убиства - земјата во која веќе шест години беснее граѓанска војна, изјави експертот на институтот, Антонио Сампајо.
Бројките на ваквата криминална активност достигнаа вредности на вооружен конфликт. Имено, овие убиства забележливо се случуваат во северниот триаголник на Централна Америка (Хондурас, Гватемала, и Салвадор, каде се регистрирани 16.000 убиства), и особено во Мексико, додаде Сампајо.
Додека во Хондурас, Гватемала и Салвадор се забележува извесен пад на бројот на убиства, во Мексико е спротивното - таму тие во периодот меѓу 2015 и 2016 година се зголемиле за 11 проценти.
Институтот смета дека ова зголемено насилство е последица на одлуката на мексиканскиот претседател Фелипе Калдерон од декември 2006 година, кога и објави војна на нарко мафијата во земјата.
- Во конфликтот што следеше меѓу декември 2006 и ноември 2012 година во убиства со умисла животот го загубиле 105.000 лица, кажа Сампајо.
Растот на насилствата меѓу 2015 и 2016 година се должи на натпреварот во вооружување меѓу картелите, чија цел е да утврдат автономија во градските реони за незаконските активности, како шверц на кокаин, производство на хероин и секојдневно зголемување на бројот на лабораториите за синтетички дроги, објасни тој.