Ерусалим, 22 мај 2017 (МИА) - Американскиот претседател Доналд Трамп пристигнува во посета на Израел и на Западниот Брег, најавен со неговата мечта да успее таму каде сите негови претходници не успеаја - да постигнат мир меѓу Израелците и Палестинците, пренесоа француските медиуми.
Трамп, кој пристига од Ријад, веќе ги демантира очекувањата за ова прашање, откако на Палестиниците им даде повеќе надежи од предвиденото, и ја разочара израелската десница, која беше воодушевена од неговиот избор.
Пројавувајќи оптимизам, американскиот претседател за овој конфликт изјави дека е еден од најстарите во светот, дека тоа е „најтешкиот договор за постигнување“, „крајниот договор“ како што своевремено вети.
„Ние ќе го постигнеме“, кажа тој.
Тој, меѓутоа, претрпе критики од Израелците во врска со изјавата на Белата куќа за крајно чувствителната тема за статусот на Ерусалим.
Трамп е исправен и пред многу внатрешнополитички проблеми, почнувајќи од истрагата за можните тајни договори меѓу членовите на неговата предизборна екипа и Русија. Информациите, според кои Трамп со Русите споделил строго тајни разузнавачки сведоштва, што биле објавени од Израел, исто така, предизвикаа остри реакции.
- Има голема опасност оваа посета да не биде продуктивна заради хаосот и полемиката во Вашингтон во овој момент, за француските медиуми објасни порпаролот на американскиот амбасадор во Израел Дан Шапиро.
Пред да се сретне со премиерот Бенјамин Нетанјаху, Трамп денеска се очекува да биде првиот актуелен американски претседател кој го посетил Ѕидот на плачот - најсветото место, на кое Евреите можат да се молат, што се наоѓа во окупираниот и анектиран Источен Ерусалим.
Израел го смета Ерусалим за своја неделива престолнина, а за Палестинците Источен Ерусалим е престолнината на државата, за која чезнеат.
Трамп утре ќе го посети градот Витлеем, на окупираниот Западен Брег, каде ќе разговара со палестинскиот претседател Махмуд Абас. Потоа ќе го посети меморијалниот споменик на жртвите на Холокаустот „Јад Вашем“во Ерусалим и ќе одржи говор во Музејот на Израел.