најмалку 48 луѓе загинаа во поплавите во западна Индија

Њу Делхи, 26 јули 2017 (МИА) - Најмалку 48 луѓе загинаа во монсунските дождови и поплавите што во последните две недели го погодија западниот дел на Индија, соопштија денеска локалните власти.
Во Раџастан, каде се наоѓаат голем број популарни туристички дестинации, во најмалку четири окрузи улиците се претворени во реки, поради што десетина илјади луѓе се заглавени на горните катови на станбените згради. Поради надојдената вода отежнати се и операциите на спасувачките екипи.
Во индиската држава Раџастан до денеска загинаа 19 лица, а во соседната држава Гуџарат најмалку 29 луѓе го загубија животот во поплавите.
Индиската метеоролошка служба предвидува обилни дождови во двете држави до крајот на неделата.
Од почетокот на сезоната на монсунските дождови во Индија, која трае од јуни до септември, до сега загинаа вкупно 83 луѓе.