Њујоршката полиција и повеќе американски федерални агенции презедоа засилени безбедносни и сообраќајни мерки во Њујорк во пресрет на денешниот почеток на годишното заседение на Генералното собрание на ОН.
Седиштето на ОН е буквално под опсада на полициските сили во очекување на пристигнувањето на шефовите на држави или влади и други високи претставници на членките на Светската организација.
Улиците во поширокото подрачје околу седиштето на ОН на Ист Ривер се затворени за сообраќај, а воведен е и посебен сообраќаен режим во целиот град.
Низ градот се распоредени дополнителен број полицајци, а за време на целиот период на траење на заседанието, елитниот антитерористички тим на њујоршката полиција ќе биде во состојба на зголемено ниво на готовност.
- Тоа ќе биде како безбедносен „Супер бол“ (финале на американскиот фудбал), изјави викендов портпаролот на њујоршката полиција Питер Доналд.
Њујоршката полиција засега не соопшти колку ќе ја чинат зајакнатите безбедносни мерки.