Сириски и руски сили бомбардираа две провинции во зоната за деескалација

Бејрут, 18 септември 2017 (МИА) - Припадници на сириските владини сили и нивните руски сојузници денеска бомбардираа две провинции, што се наоѓаат во една од зоните за деескалација во Сирија, како одговор на офанзива на исламиситите, соопшти Сирискиот центар за мониторинг на човековите права.
Исламистичката коалиција Хајат Тахрир ал Шам, чија членка е и поранешниот огранок на Ал Каеда во Сирија и која не е опфатена со договорот за примирје во земјата, започна офанзива против владините сили во провинцијата Хама, при што зазеде две села.
- Како одговор на тоа извршени се воздушни напади врз патишта за снабдување на исламистите во јужниот дел на провинцијата Идлиб и Северна Хама, изјави директорот на Центарот, Рами Абдел Рахман.
Според него, во нападите, при кои биле ранети десетици цивили, учествувала и руската авијација.
- Ова се најжестоките напари по прогласувањето на зоните за деескалација, изјави Абдел Рахман.