Би-Би-Си: Расте загриженоста поради лажни вести Лондон, 22 септември 2017 (МИА) - Меѓу корисниците на интернет се повеќе расте загриженоста поради ширењето на лажни вести, покажуваат резултатите од истражувањето на Би-Би-Си. Истражувањето е спроведено во 18 држави, а 79 проценти од испитаниците изјавиле дека се загрижени поради тоа што е лажно, а што е вистинито на интернет, но само во Кина и во Велика Британија учесниците во анкетата се изјаснија дека сакаат нивните влади законски го регулираат користењето на интернет. Но, 84 отсто од испитаниците во Грција и 82 проценти во Нигерија изјавиле дека не сакаат регулација на интернетот. Бразилците (92 отсто) се најмногу загрижени поради „нејасната линија“ помеѓу вистинските и лажните вести, а потоа следат граѓаните на Инднезија (88 проценти), на Нигерија и на Кенија (85 отсто). Истражувањето на Би-Би-Си покажува дека поголемиот број испитаниците во Германија изјавиле дека не се загрижени поради лажните вести. Над половина од испитаниците (53 проценти) изјавиле дека пристапот до интернет треба да биде фундаментално човеково право. Анкетата покажува и различни ставови меѓу половите кон интернетот - мажите го користат многу повеќе односно 78 проценти од нив изјавиле дека во последните шест месеци секојдневно користеле интернет, а жените - 71 отсто. Исто така, припадничките на понежниот пол помалку го искажуваат своите ставови на интернет. Истражувањето е спроведено од компанијата „Глобскен“ во периодот од јануари до април, при што се испитани 16.000 полнолетни граѓани од 18 држави ширум светот.
|