Американскиот претседател Доналд Трамп следната недела ќе ја повлече поддршката за договорот за иранската нуклеарна програма, затоа што смета дека тој не е во согласност со националните интереси на САД, објави „Вашингтон Пост“, повикувајќи се на извори во Белата куќа.
Весникот оценува дека ваквата одлука на Трамп би можела да биде чекор што ќе доведе до пропаѓање на овој договор, кој во 2015 година го постигнаа Иран и шесте светски сили.
Според „Вашингтон Пост“, Трамп веројатно на 12 октомври ќе одржи говор во кој ќе ја презентира својата стратегија за Иран.
Порталот „Вашингтон Фри Бикон“ вчера, исто така повикувајќи се на извори во Белата куќа, објави дека Трамп следната недела планира да соопшти дека Иран не го почитува иранскиот нуклеарен договор.
Според порталот, американскиот државен секретар Рекс Тилерсон и секретарот за одбрана Џејмс Матис бараат договорот да остане во сила, но Трамп наводно бил гневен поради иранските ракетни проби и планира да се откаже од договорот.
Трамп на 15 октомври треба да го информира Конгресот за тоа дали Иран ги почитува преземените обврски од нуклеарниот договор, по што конгресмените имаат рок од 60 дена да решат околу можно воведување санкции кон Техеран.
Повеќе републикански сенатори, меѓу кои и Тед Круз и Том Котон, го повикаа Трамп да објави дека Иран не го почитува договорот и со тоа да почне процесот за повторно воведување санкции кон земјата.