Белата куќа: Трамп најавува широка стратегија кон Иран

Вашингтон, 7 октомври 2017 (МИА) - Американскиот претседател Доналд Трамп ќе го објави новиот одговор на САД за ракетните тестирања, поддршката на „тероризмот“ и кибер операциите на Иран, како дел од неговата стратегија кон Техеран, соопшти Белата куќа.
- Претседателот не гледа само во еден дел на тоа прашање. Тој го има предвид целосното лошо однесување на Иран, истакна портпаролката на Белата куќа, Сара Сандерс.
Според неа, Трамп нема да го набљудува само лошото однесување во врска со нуклеарниот договор, „туку и тестирањето балистички ракети, дестабилизирање на регионот, поддржувањето тероризам, кибер нападите, нуклеарната програма“.
Таа нагласи дека Трамп сака да пронајде широка стратегија која се однесува на сите проблеми, а не само на еднократните.
- Тоа е она на што е фокусиран неговиот тим и она што ќе го спроведе во следните денови, нагласи Сандерс.
Весникот „Вашингтон пост“, повикувајќи се на извори блиски до Белата куќа, пишува дека американскиот претседател планира следната недела да ја повлече поддршката од нуклеарниот договор со Иран, бидејќи смета дека тој не е во национален интерес на САД. Весникот пренесува дека таквата одлука на Трамп би била прв чекор во процесот кој може да доведе до уништување на договорот меѓу шесте сили со Иран од 2015 година, со кој се ограничени нуклеарните активности на Техеран.
Трамп на 15 октомври треба да го информира Конгресот околу тоа дали Иран ги почитува обврските од договорот, а конгресмените потоа имаат 60 дена да ги разгледаат можностите за повторно воведување санкции против Техеран.