Пјонгјанг нема да преговара со Вашингтон за својата нуклеарна програма

Москва, 20 октомври 2017 (МИА) - Пјонгјанг не планира никакви преговори со САД за својата нуклеарна програма, изјави генералната директорка на Одделот за Северна Америка во Министерството за надворешни работи на Северна Кореја, Чое Сон-хуи.
Според неа, поседувањето на нуклеарно оружје е прашање на живот и смрт за Северна Кореја.
- САД ќе треба да се помират со нуклеарниот статус на Северна Кореја... Сегашната ситуација го засилува нашето сфаќање дека имаме потреба од нуклеарно оружје, за да одбиеме потенцијијален напад, рече Цој во својот говор на меѓународна конференција за неширење на нуклеарното оружје во Москва.
Таа подвлече дека Пјонгјанг не очекува нуклеарен напад од никој друг, освен од Вашингтон, и затоа ќе одговори со соодветен удар само против САД, а не против трети земји.
- Нашата нуклеарна програма и оружјето се насочени против САД. Ние на огнот ќе возвратиме со оган, рече дипломатката.