Евентуална војна меѓу САД и Северна Кореја „не е веројатна“ и покрај неодамнешната ескалација на тензиите меѓу Администрацијата на американскиот претседател Доналд Трамп и режимот на севернокорејскиот лидер Ким Џонг-ун, изјави поранешниот директор на Централната разузнавачка агенција (ЦИА), Дејвид Петреус.
- Загрижен сум, но мислам дека војна не е веројатна, нагласи Петреус во интервју за телевизијата Еј-Би-Си Њуз.
Според него, на острата реторика на Трамп кон Северна Кореја треба да се гледа како на „комуникациска стратегија“, чија цел е да се изврши притисок врз Кина за да помогне во запирањето на севернокорејската нуклеарна програма.
- Сето тоа е комуникациска стратегија со која се прави обид да и се достави до знаење на Кина дека актуелната (американска) администрација е во ситуација во која не била ниту една друга претходна администрација, додаде Петреус.
Тој смета дека дипломатските напори на американскиот државен секретар Рекс Тилерсон се насочени кон кинеското влијание врз режимот во Пјонгјанг.
Иако оцени дека војната „не е веројатна“, Петреус смета дека сепак во случај на конфликт, американските трупи се подготвени да се справат со севернокорејските сили.
- Доколку постои некаков вид воен ангажман, ќе бидеме подготвени најдобро што можеме. Сепак, не е потребно да се наспомене дека секое вакво сценарио ќе биде лошо, додаде Петреус.
Поранешниот директор на ЦИА се осврна и на потиснувањето на џихадистите од Исламската држава (ИД) од сирискиот град Рака, оценувајќи дека овие воени порази „ќе ја намалат способноста на терористичката група за регрутирање нови борци“.