Најмалку пет лица загинаа, а 10 други меѓу кои и деца, се ранети вчера кога вооружен маж отвори оган во градот Ранчо Техама во северниот дел на американската сојузна држава Калифорнија.
Според полицијата, напаѓачот пукал по жртвите по случаен избор, по што бил убиен од страна на еден од замениците на локалниот полициски шериф.
Кај застреланиот напаѓач биле пронајдени полуавтоматска пушка и два пиштоли.
Инцидентот се случи во близина на основно училиште во 8:00 часот по локално време (17 часот по средноевропско време).
Според полицијата, најверојатно станува збор за „инцидент поврзан со семејно насилство“.
Ранчо Техама се наоѓа на 184 километри северно од главниот град на Калифорнија, Сакраменто.
Вчерашниот напад следува по помалку од десет дена по инцидентот во кој вооружен маж уби 26 лица во една баптистичка црква во американската сојузна држава Тексас.
Според полициските податоци, од истрели од огнено оружје дневно во САД животите ги губат по околку 90 лица.