Тројца талибански исламисти маскирани во бурки денеска нападнаа факултет во пакистанскиот град Пешавар и убија најмалку девет лица, додека 35 се ранети. Пакистанската армија и полиција реагираа и ги убија напаѓачите.
Бројот на убиени можел да биде многу поголем, но факултетот бил затворен поради верски празник, и две третини од студентите заминале во своите домови.
Осуммина од убиените се студенти, а еден е вработен на факултетот.
Во 2014 година талибанците нападнаа воена академија во Пешавар и убија над 140 лица.
Талибанското движење, кое се бори за уривање на пакистанската Влада и воведување на муслиманското шеријатско право, презеде одговорност за нападот.
Тоа движење е особено активно во соседниот Авганистан, каде беше на власт до американската интервенција во 2001 година, но има логистички бази и поддржувачи и во Пакистан.