Највисоко поставениот демократ во сенатската комисија за разузнавање во САД, Марк Ворнер го предупреди претседателот Доналд Трамп дека ако го разреши специјалниот обвинител Роберт Мјулер, кој раководи соа федералната истрага за поврзаноста на претседателскиот тим со Русија, може да предизвика „уставна криза“.
Во говор на конгресна трибина, сенаторот Ворнер остро ги осуди се почестите напади од страна на републиканците и директно од Белата куќа околу непристрасноста на Мјулер, и инсистираше дека „истрагата треба непречено да продолжи“. Тој исто така предупреди дека би имало опасни последици доколку претседателот одлучи да помилува кого било од истрагата на Мјулер.
Минатиот викенд Трамп истакна дека воопшто не размислува да го разреши Мјулер, а адвокат на Белата куќа неколку пати подвлече дека претседателот нема намера да помилува кого и да е.
Според американските медиуми, Трамп не може директно да го разреши Мјулер, но критичарите на Белата куќа се сомневаат дека тој може да побара од функционери во Министерството за правда да го отпуштат, а потоа да ги разреши нив, ако не ја спроведат неговата наредба.
- Конгресот треба јасно да му стави до знаење на претседателот дека разрешувањето на специјалниот обвинител или секоја интервенција во неговата истрага преку претседателско помилување на клучни сведоци, е неприфатливо и ќе има итни и значајни последици, изјави сенаторот Ворнер.