Турскиот министер за надворешни работи Мевљут Чавушоглу го предупреди американскиот државен секретар Рекс Тилерсон дека воената операција на Анкара во сирискиот реон Африн може да се прошири кон соседниот град Манбиџ.
Таквиот потег би значел конфронтација помеѓу Турција и САД, кои се сојузници во НАТО. Африн и Манбиџ се контролирани од курдските сили поддржани од САД, кои Турција ги смета за терористи.
- Терористите во Манбиџ постојано извршуваат напади. Ако САД не можат да ги спречат, ние ќе го направиме тоа, рече Чавушоглу, цитиран од турскиот весник „Хабертјурк“, информирајќи за неговиот последен телефонски разговор со Тилерсон.
Турскиот министер за надворешни работи изјави дека побарал од американскиот колега да не биде портпарол на курдските Сили за заштита на народот, кои го контролираат Африн.
Чавушоглу рече дека САД не би требало да „застанат на страната на терористите“, туку да го поддржат својот сојузник Турција.