Подготвеноста на Северна Кореја за дијалог со САД би можела да претставува прв чекор кон денуклеаризација на Корејскиот Полуостров, соопшти синоќа портпаролот на Белата куќа, Сара Сандерс.
- Ќе видиме дали пораките на Пјонгјанг претставуваат прв чекор на патот кон денуклеаризација. САД и светот треба да продолжат јасно да порачуваат дека нуклеарната и ракетната програма на Северна Кореја немаат перспектива, нагласи Сандерс.
Таа додаде дека САД остануваат на ставот оти секој дијалог со Пјонгјанг треба да резултира со договор за денуклеаризација на Корејскиот Полусотров.
Реакцијата на Белата куќа уследи по инфромациите дека вчера на средба со јужнокорејскиот претседател Мун Џе-ин по затворањето на Зимските олимписки игри во Пјонгчанг, претставници на Северна Кореја „манифестирале доволна волја“ за дијалог со САД.
Кабинетот на Мун соопшти дека јужнокорејскиот претседател вчера имал средба со високиот претставник на севернокорејската владејачка Работничка партија, Ким Јонг-чој, при што нагласил дека е потребно што поскоро да почне дијалог меѓу САД и Северна Кореја, како предуслов за подобрување на однсоите меѓу Сеул И Пјонгјанг и за решавање на корејското прашање.