Високи официјални претставници на Северна и Јужна Кореја на преговорите во демилитаризираната зона Панмунџон одржани денеска, се договрија средбата меѓу лидерите на двете земји Ким Џонг-ун и Мун Џе-ин да се одржи на 27 април.
На средбата меѓу Ким и Мун се очекува да се направи обид за надминување на затегнатоста околу ракетната и нуклеарната програма на Северна Кореја.
Денешниот договор доаѓа по ненадејната посета на севернокорејскиот лидер на Пекинг, каде се сретна со кинескиот претседател Си Џинпинг, со цел координација и зајакнување на позициите на двете земји пред планираните средби на Ким со јужнокорејскиот претседател Мун и со претседателот на САД, Доналд Трамп.
Во меѓу време генералниот секретар на владиниот Кабинет, во Токио Јошихиде Суга соопшти дека јапонската Влада води дијалог со Северна Кореја преку различни канали, вклучително и преку Амбасадата во Пекинг.
Тој сепак не одговори на прашањето дали во моментов се разгледува можноста за одржување средба на врвот меѓу премиерот Шиндзо Абе и севернокорејскиот лидер Ким Џонг-ун.
Весникот „Асахи“ претходно јави дека таква средба може да се одржи во јуни годинава, веднаш по очекуваните состаноци на Ким Џонг-Ун со претседателите на Јужна Кореја и САД - Мун Џинг-ин и Доналд Трамп.
Според весникот, можноста за средба на врвот Јапонија-Северна Кореја била разгледана на неодамнешниот состанок во Пјонгјанг на раководството на Корејската работничка партија.