Единаесет лица загинаа во бродска несреќа на Хаити
Порт-о-Пренс, 12 мај (МИА) - Единаесет лица загинаа кога ферибот се преврте во близина на брегот на карипската држава Хаити, соопштија претставници на Мисијата на ОН во оваа земја, а потврди и Владата на Хаити.
Од водата досега биле извлечени 11 тела, од кои пет се деца.
На бродот се наоѓале стотина луѓе од кои повеќето успеале да се спасат пливајќи до брегот. Бродот потонал во близина на главниот град на Хаити, Порт-о-Пренс.
Бродот се наоѓал на дводневно „бавно“ возење по должината на хаитскиот јужен полуостров, а превезувал луѓе, храна и јаглен. При неколкуте претходни застанувања тој бил пренатоварен, што резултирало со трагична последица при последното испловување.
|