Вести / Свет
Раст на цената на нафтата на светските берзи
Сингапур, 16 мај (МИА) - Нафтата поскапе денеска на азиските берзи, како резултат на намалувањето на глобалните залихи на енергенсот и шпекулативните тргувања на дилерите.
Американската лесна нафта за испорака во јуни поскапе за 93 центи на 125,05 долари за барел, што е речиси за два долари пониска цена од рекордните 126,98 долари за барел остварена во вториникот.
Цената на европскиот брент од Северното Море за достава во јули се зголеми за 62 центи на 123,25 долари за барел. Синоќа на затворањето на Берзата во Лондон, оваа нафта, но за јунска испорака, се продаваше за 122,77 долари за барел.
Според енергетскиот аналитичар на консултатската агенција „Парвин и Герц“, Виктор Шум, продлжува тенденцијата на раст на цените на нафтата, во услови на оскудност на глобалниот нафтен пазар.
- Побарувачката на нафта покажува тенденции на намаување, но нема информации дали тоа значи дека нафтените резерви се зголемиле, наведува Шум, додавајќи дека Организацијата на државите извознички на нафта (ОПЕК) и натаму одбива да го зголеми своето дневно производство на енергенсот.
Според него, нафтениот пазар е под влијание и на шпекулативните тргувања од страна на дилерите, кои купуваат нафта кога нејзината цена ќе се намали.
- Инвеститеорите се ориентираат кон нафтата, бидејќи тргувањето со неа е поисплатливо откоклку купувањето на валути или обврзници... Тие парите ги насочуваат таму каде што има можност за поголема заработка, а нафтата нуди подобар профит, смета Шум.
Според него, на денешниот раст на цената на нафтата влијание има и вчерашната експлозија на еден нафтовод во Нигерија, при што загинаа околу сто лица.
Шум смета дека на пазарот постои тенденција за одржување на цената на нафтата над 120 долари за барел, но темдемција да не се дозволи нејзино зголемување над 130 долари.
- Во следниот период (нафтата) ќе се продава во рамките меѓу 120 и 130 долари, оценува Шум.
ОПЕК, која обезбедува 40 отсто од светските нафтени потреби, и натаму одбива да го зголеми дневното производство на нафта со образложение дека високите цени не се последица на недостиг на енергенсот на пазарот, туку на успорениот економски раст во индустриските земји, пред се во САД.
Меѓународната агенција за енергија (ИЕА) процени дека во следните месеци ќе претстои намалување на дневната побарувачка на нафта за 390.000 барели на 86,8 милиони барели.
Од почетокот на годината, кога нафтата чинеше околу 100 долари за барел, нејзината цена е зголемена за над 25 отсто. Некои аналитичари проценуваат дека во следните месеци нафтата би можела да поскапи и до 200 долари за барел.
|
|