„Дејли телеграф“: Убиецот со булдожер од Ерусалим бил растроен поради разделбата со една еврејка
Лондон, 3 јули (МИА) - Убиецот со булдожер од Ерусалим, кој при вчерашниот напад врз еден градски автобус уби три лица и повреди уште 40 други, бил психички растроен човек, поради насилно прекинатата љубовна врска со една млада еврејка, тврди „Дејли телеграф“, повикувајќи се на изјавите што за весникот ги дале неговите роднини.
Како што јави дописникот на МИА од Лондон, Хусам Дваит (30), Палестинец од источен Ерусалим, вработен како булдожерист во една израелска градежна компанија, по нападот беше убиен од еден полицаец кој во тој момент не бил на должност и од еден војник, кои во тој момент се затекнале на местото на нападот.
Роднините на Дваит велат дека се шокирани од настанот и од постапката, но тврдат дека зад тоа нема никакви политиќки мотви. - Хусам не беше припадник ниту на Хамас, ниту на било која друга партија или политичка група, изјави за „Дејли телеграф“ еден негов близок роднина.
Тој открива дека иако Дваит бил женет и имал две деца, живеел со една млада еврејка, доселеничка од Русија, се додека една ноќ таа не била грабната од припадници на една радикална еврејска групација и одведена назад кај нејзиното семејство. Потоа разочараниот и повреден Палестинец бил уапсен и осуден на една година затвор поради земање дрога. Сите негови роднини за кои весникот вели дека живеат во близина на местото каде се случи нападот на автобусот, работат во израелски компании.
Полицијата во Ерусалим која го истражува трагичниот инцидент, потврди дека Хусам Дваит „по се изгледа делувал сам“.
Милитантната организација Хамас претходно соопшти дека „нападот“ е одговор на Палестинците на насилството што во Појасот Газа ја врши израелската армија, иако призна дека таа нема ништо со она што се случи во Ерусалим.
|