Нафтата поскапе на над 126 долари за барел
Лондон, 25 јули (МИА) - По континуираниот двонеделен пад на нејзината цена, нафтата на денешните тргувања на светските берзи поскапе на над 126 долари за барел, како резултат на намалувањето на вредноста на американскиот долар.
На берзата во Лондон цената на европскиот „брент“ од Северното Море за испорака во септември се зголеми за 86 центи на 127,30 долари за барел, додека американската лесна нафта, исто така за септемвриска достава, на Берзата во Њујорк поскапе за 68 центи на 126,17 долари за барел.
Во средата нафтата на светските берзи поевтини на 124,4 долари за барел што претставуваше нејзина најниска цена од 4 јуни. Сега нафтата чини за околу 15 проценти помалку во споредба со нејзината рекордна цена од 11 јули од 147,27 долари за барел.
Аналитичарите проценуваат дека денешниот раст на цената на нафтата се должи на намалување на вредноста на доларот во споредба со еврото и јапонскиот јен, со што инвеститорите во обид да се ослободат од залихите на американската валута купуваат суровини, пред се нафта.
Еврото денеска се менува за 1,5679 долари, што претставува раст на неговата вредност во однос на вчерашниот ден, кога за една европска се добиваа 1,5737 американски валути. Во исто време вредноста на доларот падна и во однос на јапонскиот јен од вчерашните 107,13 на 107,29 јени.
Падот на вредноста на доларот се објаснува со намалувањето на продажбата на недвижности во САД во текот на јуни за 2,6 проценти, што претставува двојно поголемо намалување од очекуваното.
Аналитичарот на „Комонвелт банката на Австралија“, Дејвид Мур оценува дека до поголем раст на цената на нафтата не дошло поради стравувањето на инвеститорите од натамошно намалување на потрошувачката на горива во САД.
- Потрошувачката на нафта во САД е помало во споредба од пред една година, што мислам дека е доказ оти пазарот се прилагодува на високите цени на „течното злато“, изјави Мур.
Во претходните четири недели, заклучно со 18 јули, потрошувачката на горива во САД е намалена за 2,4 отсто во однос на истиот период лани. Аналитичарите наведуваат дека ваквото намалување можеби не изгледа значајно, но сепак укажува на промена на однесувањето на граѓаните на САД, кои се најголем светски потрошувач на енергенси.
|