Вашингтон, 28 октомври (МИА) - Братот на авганистанскиот претседател Хамид Карзаи, Ахмед Карзаи редовно добивал пари од американската ЦИА, пишува весникот „Њујорк тајмс“, цитирајќи актуелни и поранешни американски високи функционери.
Ахмед Карзаи е осомничен за важен учесник во трговијата со опиум во Авганистан, а изминатите осум години, според весникот, ЦИА му плаќала пари за повеќе услуги, меѓу кои и за собирање луѓе за учество во авганистанските паравоени сили, кои дејствуваат по наредбите на ЦИА во и околу јужниот град Кандахар.
Братот на авганистанскиот претседател изјави дека соработува со американски цивилни и воени претставници, но оти не е вклучен во трговија со дрога и не прима пари од ЦИА.
ЦИА не ја потврди, но ниту ја демантираше оваа информација.
Според весникот финансиските врски на ЦИА со Ахмед Карзаи и нивната меѓусебна соработка предизвикале длабоки несогласувања во администрацијата на Обама, а аналитичарите сметаат дека тие врски натамошно ги комплицираат и онака затегнатите односи меѓу Вашингтон и претседателот Карзаи.
- Овие активности на ЦИА исто така покажуваат дека САД не прават се за да се справат со високопрофитната трогвија со дрога во Авганистан, која е главен извор за финансирање на талибанците, додава „Њујорк тајмс“.