Кабул, 31 октомври (МИА) - Поранешниот авганистански министер за надворешни работи Абдула Абдула ќе го бојкотира вториот круг од претседателските избори во Авганистан, доколку до крајот на денов не се обезбедат серија услови со кои ќе се гарантира оти гласањето ќе се одвива регуларно, соопштија претставници на изборниот штаб на претседателскиот кандидат.
- Нема да учествуваме на изборите, доколку тие не бидат транспарентни и регуларни, изјави претставник на изборниот штаб на Абдула.
Во вториот круг од претседателските избори, кој ќе се одржи на 7 ноември, ќе учествуваат Абдула Абдула и актуелниот авганистански претседател Хамид Карзаи.
Првиот круг од изборите беше одбележан со насилство, слаб одѕив на гласачите (38,7 проценти) и масовни изборни нерегуларности во корист на Карзаи.
Абдула Абдула на почетокот на неделата побара разрешување на претседателот на Независната изборона комисија, која е одговорна за организација на гласањето и за пребројувањето на гласовите, обвинувајќи го дека дејствувал во корист на Карзаи. Од администрацијата на претседателот го отфрлија ова барање.