Вашингтон, 13 јануари (МИА) - Силен земјотрес со интензитет од седум степени по Рихтеровата скала го погоди островот Хаити. Под закана за цунами се карибските држави Хаити, Куба, Доминиканската Република и Бахамите, соопшти Тихоокеанскиот центар за следење цунами.
„Постои опасност од појава на локални цунами кои може да погодат до стотина километри од епицентарот на земјотресот“, се вели во соопштението. Епицентарот според првото соопштение е регистриран во морето, но подоцна беше прецизирано дека е на копно на 10 км. од главниот град на Хаити, Порт-о-Пренс.
Неколку минути по првичниот потрес регистриран се и два други со интензитет од 5,9 и 5,7 по Рихтер, соопшти Геофизичкиот институт на САД.
Во главниот град на Хаити, каде живеат околу два милиона жители, има големи материјални штети и најверојатно голем број загинати, јавуваат американски медиуми.
- Бројот на загинатите е неколку стотици, изјави лекар во градот. - Центарот на градот е разрушен, ова е вистинска катастрофа, изјави локален жител.
Комуникациите се прекинати, а урната е и зградата на мисијата на ОН за стабилизирање на Хаити. Бројот на луѓе во мисијата е околу 9.000.
Во инсерти на американски телевизии се гледаат разрушени голем број згради меѓу кои и претседателската палата. Во Вашингтон се подготвува итно испраќање помош за карипската држава. Потресот бил почувствуван и од жителите на источниот дел од Куба.