Порт-о-Пренс, 13 јануари (МИА) - Неколку илјади луѓе најверојатно ги загубија животите во катастрофалниот земјотрес што се случи синоќа во Хаити, а според извештаи на американски медиуми, центарот на главниот град Порт-о-Пренс е речиси целосно уништен.
Во градот нема струја, а луѓето се вон своите домови.
- Куќи се урнати и голем број се наоѓаат на улица. Има многу повредени, изјави за Би-Би-Си жител на градот.
Други очевидци зборуваат за хаос, мртви тела на улиците и за луѓе кои копаат по урнатините во обид да спасат преживеани.
Комуникациите се тешко оштетени. Тешко оштетени се и болници, неколку хотели, претседателската палата и зградата на мисијата на ОН чии претставници потврдија дека голем број од персоналот се води како исчезнат. Мисијата има околу 9.500 луѓе.
Американскиот државен секретар Хилари Клинтон во момент на земјотресот била на Хаваи.
- Се уште се собираат податоци за катастрофалниот земјотрес и последиците. САД понудија помош за Хаити и за другите држави во регионот, изјави Клинтон.
Франција исто така вети помош, а Венецуела планира да испрати воен авион со храна, лекови и вода за пиење.
Интерамериканската банка за развој соопшти дека одобрила 200 милиони долари помош за Хаити.
Силен земјотрес со интензитет од седум степени по Рихтеровата скала го погоди синоќа островот Хаити. Епицентарот според првото соопштение бил регистриран во морето, но подоцна беше прецизирано дека тој бил на копно на 10 километри од главниот град на Хаити, Порт-о-Пренс.
Неколку минути по првичниот потрес, регистрирани се и два други со интензитет од 5,9 и 5,7 по Рихтер, соопшти Геофизичкиот институт на САД. Во главниот град на Хаити живеат околу два милиона жители. Потресот бил почувствуван и од жителите на источниот дел од Куба.