Порт-о-Пренс, 15 јануари (МИА) - Околу 7.000 жртви на катастрофалниот земјотрес што во вторникот го погоди Хаити беа погребани во масовна гробница, соопшти претседателот на земјата Рене Превал.
- Веќе погребавме 7.000 лица во масовна гробница, рече Превал на аеродромот Порт-о-Пренс, каде го пречека претседателот на Доминиканската република Леон Фернандес - првиот странски шеф на држава кој го посети Хаити по земјотресот од седум степени по Рихтер што во вторникот ја погоди карипската држава.
Фернандес истакна дека едно од најважните нешта кои му требаат на Хаити е помош за погребување на загинатите.
Гневни Хаиќани поставија патни блокади со тела на загинати во Порт-о-Пренс, за да протестираат против бавното пристигнување хуманитарна помош, што се уште не стигнала до нив.
Фоторепортер на списанието „Тајм“ Шаул Шварц изјави дека видел во престолнината најмалку две такви патни блокади од тела на жртви на земјотресот и на урнатите згради.