Порт-о-Пренс, 30 јануари (МИА) - Американската армија денеска соопшти дека го прекинала пренесувањето на повредените од земјотресот во Хаити во САД, поради стравувањата на некои американски сојузни држави за тоа кој ќе го плати нивното лекување.
- Во овој момент ги прекинавме летовите, изјави шефот на хуманитарната операција на американските сили на Хаити, Кевин Андал.
Според Андал, ваквата одлука била донесена откако сојузната американска држава Флорида побарала од Администрацијата во Вашингтон помош за плаќање на лекувањето на повредените, а слично барање испратила и Џорџија.
- Тоа не значи дека повредените Хаиќани не добиваат медицинска помош. Овде имаме болнички објекти во кои ги згрижуваме, нагласи Андал.
Во меѓу време, Мисијата на ОН во Хаити соопшти дека последните денови во камповите во кои се сместени лицата од подрачјата погодени од катастрофалниот земјотрес, е зголемен бројот на заболени од дијареја и сипаници и на затруени.