Вашингтон, 23 март (МИА) - Ерусалим не е израелска колонија, туку е престолнината на Израел, изјави израелскиот премиер Бенјамин Нетанјаху во говорот што го одржа во Вашингтон пред делегати на годишната конференција на најголемата еврејска лоби организација во САД.
-Еврејскиот народ го изгради Ерусалим пред 3.000 години и продолжува да го гради и денеска. Ерусалим не е некаква колонија. Тоа е нашата престолнина, рече премиерот.
На овие зборови 7.500-те делегати станаа на нозе и бурно го поздравија со ракоплескање.
Нетанјаху во говорот изрази увереност дека Израел и во иднина ќе ги зачува пријателските односи со САД, нарекувајќи ги „најголемата земја во светот“.
Односите меѓу САД и Израел во моментов се затегнати заради израелските планови за изградба на нови населби во анектираниот источен дел на Ерусалим.
Во говорот Нетанјаху ја спомена и иранската нуклеарна закана.
-Израел очекува од меѓународната заедница да дејствува брзо и решително, за да ја спречи опасноста Иран да се здобие со нуклеарно оружје. Но, Израел, сепак, го зачувува правото самиот да се заштитава од ваквата закана, изјави премиерот.
Нетанјаху денеска треба да има средба со американскиот претседател Барак Обама. Доцна синоќа во хотел во Вашингтон тој имаше разговор и со државниот секретар на САД Хилари Клинтон, но детали од разговорот не беа соопштени.