Бишкек, 8 април (МИА) - Роза Отумбаева која ја предводи привремената Влада, составена од опозицијата во Киргистан, изјави дека повеќето региони во државата се под контрола на новата власт.
Пред новинари во Бишкек, таа додаде дека се уште не е воведена контрола врз регионот на Ош и Џалалабад, но „се работи на тоа“.
Според неа, претседателот Бакиев кој синоќа побегна од главниот град, е во Џалалабад, негов роден град каде се обидува да придобие приврзаници.
Отумбаева објави дека новата Влада го распуштила парламентот и има намера да направи измени во законите за избори и политички партии кои беа изменети од Бакиев за да обезбеди доминација на приврзаниците во парламентот. Опозицијата смета да почне преговори со него да поднесе оставка.
- Луѓето кои беа убиени вчера се негови жртви, потенцира Отумбаева.
Новиот министер за одбрана Исмаил Исаков изјави дека вооружените сили се под контрола на опозицијата.
- Воена сила нема да се употребува за решавање на внатрешнополитички проблем, додаде тој.