Бишкек, 9 април (МИА) - Соборениот киргистански претседател Курманбек Бакиев денеска најави дека е подготвен да преговара со опозицијата со цел да се спречи граѓанска војна.
- Не планирам да ја напуштам земјата и нема да се повлечам од претседателската функција. Основна цел ми е да го спречам конфликтот и граѓанската војна, истакна Бакиев, кој е во градот Џалал Абад, јужниот дел на Киргистан.
Тој истакна дека не издал наредба да се пука врз демонстрантите. Бакиев наведе дека САД и Русија не се вмешани во немирите во Киргистан.
Бакиев побегна од Бишкек по судирите меѓу полицијата и демонстрантите при што загинаа 76, а 150 луѓе беа повредени.
Лидерката на привремената влада, Роза Отунбаева денеска го обвини Бакиев дека се обидува да се врати на власт. Таа наведе дека привремената влада нема да преговара со Бакиев.
Во Киргистан денеска и утре се денови на жалост поради големиот број на загинати во нередите. Неколку илјади луѓе по тој повод се собраа на централниот плоштад во Бишкек.